خصوصيتك وخصوصية ولادك

آخر تحديث: ٩ نوفمبر ٢٠٢٦. الكلام ده بيشرح إحنا بنجمع إيه، وليه، ومين بيشوفه، وإزاي تمسحيه.

بنجمع إيه

• حساب الدخول: الإيميل اللي بتدخلي بيه (جوجل أو إيميل وكلمة سر).
• عنك: اسمك ورقم الواتساب والمحافظة.
• عن ابنك أو بنتك: الاسم الأول، السن، المكان، التعليم والشغل، الدين ودرجة الالتزام، الحالة الاجتماعية، خطط ما بعد الجواز، مواصفات الشريك، الكلام اللي بتكتبيه، والصور لو أضفتيها.
• إقرارك الموقّع باسمك إن ابنك أو بنتك عارفين وموافقين.
• ردودك على الترشيحات، ورسايلك مع الماما التانية، وبيانات التحويل اللي بتكتبيها لو دفعتي.

مش بنطلب بطاقة رقم قومي ولا أي ورق رسمي، ومش بنطلب بيانات الكارت البنكي.

ليه

علشان نراجع البروفايل، وندوّر على ترشيحات مناسبة، ونكلمك على واتساب، ونأكد التحويلات. مش بنبيع بياناتك ولا بنشاركها مع حد للإعلانات.

مين بيشوف إيه

• فريق كلّم ماما بيشوف البروفايل والصور علشان يراجعهم ويرشّح.
• الماما اللي بنرشّحلها بتشوف الأول ملخص من غير اسم ولا مكان بالتحديد ولا صور.
• لو فتحت الترشيح، بتشوف الاسم الأول والتفاصيل وكلامك عن ابنك أو بنتك. الصور لأ.
• الصور بتظهر للمامتين بس لما الاتنين يوافقوا على بعض.
• الشات بين المامتين خاص. فريقنا مش بيقرأه، إلا لو واحدة منكم بلّغت عنه.
• رقم الواتساب بتاعك مش بيظهر لأي ماما، إلا لو إنتي بعتيه بنفسك في الشات.

بتتحفظ فين

على خدمة Google Firebase في منطقة الدوحة، ومحمية بقواعد بتمنع أي حد يقرأ بيانات مش بتاعته. ده بيتراجع ويتختبر مع كل تحديث.

إقرار الأم

لما بتسجّلي ابنك أو بنتك، بتقري إنهم عارفين وموافقين على مشاركة بياناتهم وصورهم، وبتكتبي اسمك بالكامل كتوقيع. الإقرار بيتسجل باسمك ووقته.

المسح

تقدري تمسحي بروفايل أي حد من ولادك، أو حسابك كله وكل بياناتك، من صفحة «حسابي» في أي وقت. ولما تختاري «مبروك، اتفقنا» بعد ترشيح، بنمسح البروفايل والصور لوحدهم. وأي ابن أو بنت يقدر يطلب مسح بياناته بنفسه من صفحة المسح، من غير أسئلة.

شروط الاستخدام باختصار

• الخدمة للأمهات اللي بيدوّروا لولادهم وبناتهم فوق ٢١ سنة، على جواز رسمي موثّق.
• إنتي مسؤولة إن البيانات صحيحة وإن ابنك أو بنتك موافقين.
• اتقابلوا في مكان عام أو في البيت مع العيلة، ومحدش يطلب فلوس أو تحويلات من التاني. أي حد بيخالف ده بيتقفل حسابه.
• إحنا بنرشّح ونعرّف، والقرار دايمًا للعيلتين. مش بنضمن إن الترشيح هيكمل.
• فلوس الترشيح مقابل فتحه، ومش بترجع بعد ما يتفتح. ولو الماما التانية اعتذرت أو مردتش خلال ٧ أيام، الترشيح الجاي علينا.

للتواصل

لأي سؤال أو شكوى أو طلب بخصوص بياناتك، ابعتيلنا على support@solomates.app.

القانون

بنحترم قانون حماية البيانات الشخصية المصري (رقم ١٥١ لسنة ٢٠٢٠) ومبادئه: أقل بيانات ممكنة، لغرض واضح، ومسح عند الطلب.